«شىعىس» وڭىرلىك قولباسشىلىعىندا قازاقستان مەن رەسەي ەلىنىڭ اسكەري وقۋ ورىندارىنىڭ وفيتسەر-تۇلەكتەرىمەن وقۋ-ادىستەمەلىك جيىن ءوتتى. ۇلتتىق ۇلاننىڭ اسكەري ينستيتۋتىن وقىپ بىتىرگەن جاس لەيتەنانتتار جەدەل شاقىرىلىمداعى ساربازداردى جانە ءوز ءىسىنىڭ كاسىبي مامانى بولعان كەلىسىم-شارت نەگىزىندەگى اسكەري قىزمەتكەرلەردىڭ جەكە قۇرامىن دا باسقاراتىن بولماق.
- جيىن بارىسىندا لەيتەنانتتار ءوز كاسىبي دايىندىقتارىن جوعارىلاتىپ, الداعى اسكەري قىزمەتىنە كىرىسپەس بۇرىن ءبىلىم مەن بىلىكتىلىكتەرىن سىناپ, شەبەرلىكتەرىن شىڭدايتىن بولادى, - دەدى «شىعىس» وڭىرلىك قولباسشىلىعىنىڭ باسپاسوز قىزمەتىنىڭ باسشىسى باعدات امانگەلدى, - 3 كۇنگە سوزىلعان وقۋ-ادىستەمەلىك جيىن بارىسىندا لەيتەنانتتار جەكە قۇراممەن ساپتىق جانە اتىس دايىندىقتارىن جۇرگىزۋدى تاعى ءبىر پىسىقتاپ, تاجىريبەلى وفيتسەرلەردەن ءتالىم الدى. سونىمەن قاتار اسكەري جارعىلار بويىنشا بىلىمدەرى سىنالىپ, دەنە دايىندىقتارىن انىقتاۋ ماقساتىندا سپورتتىق نورماتيۆتەر تاپسىردى.
ۇلتتىق ۇلاننىڭ «شىعىس» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امريەۆ جاس لەيتەنانتتارمەن كەزدەسىپ, ءوزىنىڭ اسكەري ومىرىندەگى تاجىريبەلەرىمەن دە ءبولىستى.
«شىعىس» وڭىرلىك قولباسشىلىعىنىڭ جاۋىنگەرلىك دايىندىق باسقارماسىنىڭ باسشىسى پولكوۆنيك سەرگەي سەرگەەۆتىڭ ايتۋىنشا, ولاردىڭ باستى ماقساتى - جاس لەيتەنانتتاردى «شىعىس» وڭىرلىك قولباسشىلىقتارىنا قاراستى سەمەي, وسكەمەن سياقتى اسكەري بولىمدەرگە تاراتىپ, ءوز ماماندىقتارى بويىنشا ءتيىستى لاۋازىمدارعا تاعايىنداۋ.
قازىرگى تۇركىستان وبلىسى, سارىاعاش اۋدانى, تەمىرشى اۋىلىندا دۇنيەگە كەلگەن لەيتەنانت سەرىك ورالباي العاشقى اسكەري قىزمەتىن «شىعىس» وڭىرلىك قولباسشىلىعىنا قاراستى پاۆلودارداعى 5512 اسكەري بولىمىندە باستاماقشى. ول ۇلتتىق ۇلاننىڭ اسكەري ينستيتۋتىن تاربيەشى ماماندىعى بويىنشا تامامداعان.
- الداعى ۋاقىتتا ءوز ماماندىعىم بويىنشا ساربازداردى تاربيەلەيتىن بولامىن جانە ءبىز وتان قورعاۋشىلارىمىزدىڭ رۋحىن مورالدىق پسيحولوگيالىق جاي-كۇيىن رەتكە كەلتىرەتىن بولامىز. بۇل ماماندىق جەكە مەن ءۇشىن ەڭ باستى جاۋاپكەرشىلىك بولىپ سانالادى, - دەيدى سەرىك ابدىراشيد ۇلى.
راۋشان نۇعمانبەكوۆا